Grónar götur eru ljósmyndir teknar 2012, utan fjórar frá 1978 á Fossá
í Kjós. Myndavélinni er beint að eyðijörðum í nágrenni Reykjavíkur.
Ekki er um tæmandi umfjöllun að ræða en þær jarðir sem um er fjallað,
eiga það sameiginlegt að hafa farið í eyði um og eftir miðja síðustu
öld, eða síðar. Lengst er farið upp í Skorradal og suður í Selvog. Í
upphafi er litast um í Hraunum sunnan Straums við Hafnarfjörð þar sem
nærvera verksmiðju og þéttbýlis er mikil en umhverfið talar um mannlíf
fyrri tíma. Enda voru þar 12 býli og kot um aldamótin 1900. En öll
þessi býli og bújarðir eiga sér sögu mannlífs sem hefur tekið enda,
eða hvað? Möguleikinn er ef til vill enn fyrir hendi, landið og
náttúran eru enn til staðar, til að taka við nýrri sögu, eins og
reyndin er með Þverárkot á Kjalarnesi.